الأجزاء السابقة :

( الأول ) و  ( الثاني )  و  ( الثالث )

,

اه كم حذرتك
من اللعب بفأس العبث
في غابة الحب
لان اشجارها تحمل الى الابد
أي كلمة حلوة تنقشها
على جذوعها
و أي جرح …اي جرح
***
و لكنك لم تصدق
ان مخمل قلبي
يستطيع ان يصيير فولاذا..
و ان ينابيعي المتفجرة في مواطىء قدميك
تستطيع ان تستحيل صبارا ناريا
مسموم الاشواك
و ان كلمة وداعا
صارت تعني ببساطة : وداعا!!…

غادة السمان

,

,

,

كنت متشوقة لأعرف المنعطف الذي تحدثت عنه ريم في المقهى , بمجرد ما أنطلقت السيارة بنا في طريق العودة قالت:

- ميشا إيش رأيك بالحب ؟

- رأيي أنا ؟

- إيوة لو ما كان يكلف عليك يعني !!

- إمممم    حاجة طيبه والله   يعني  أكوس الحاجات يعني لمن تحبين (على ذمة الأغاني والأفلام ) يسير قلبك يدق والدنيا ملونة وماعاد البني آدم ياكل هوى في الدنيا  يسير ياكل ورد   يعني  أشياء من هذا القبيل والعهده  ع الرواي   !

- طيب ليش انا كنت آكل هوى منه ؟

- يعتمد على فصيلة اللي تحبينه الرجال بالحب ينقسمون إلى 4 أقسام :

قسم  كذاب  وعيني عينك  يكذب ويسوي عاشق ولهان مع إنه عارف إنه مكشوف لكن مبسوط باللعبة

قسم كذاب لكن  مخادع حبتين يعني تاخذي وقت لين تكتشفينه

وقسم كذاب برضو  لكن ممثل بارع

وقسم أساساً ما يعطي وجه بس البنت الضعيفه تتوهم  وهذا النوع اللي كنتِ تصادفينه في قصص حبك للأسف يعني أحمدي ربك ماكان من لاأصناف الثلاثة الأولى

( لم أتمالك نفسي وأطلقت ضحكه من نوع الي يطلع معاها دموع ) قالت ريم :

-  على فكرة دمك ثقيل

- أعرف

-  على بالي بيكون عندك كلام  عليه القيمة

- من متى قلت شيء عليه القيمة انا ؟ المهم كملي ياصاحبة القلب الأفدغ

-  المهم وبعد فترة قنص قصيرة جداً لعيني السحرية بدأ قلبي المفدوغ ينبض بالحب من جديد  وطبعاً كان في نفس الحارة مارحت بعيد عشان يكون التواصل أفضل بدال حركات البكا والشوق والكلام الفاضي  ونطرتك ياحبيبي  ومتى أشوفك متى ؟  , كان إسمه أحمد مناور

- إيش دخل إسم أبوه تقولينه ؟

- لأني كنت أناديه كذا

- اها

- كان يفرق عن اللي حبيتهم قبله ولد حليوة ومغرور  وهذا اللي خلاني أتغاضى عن تطنيشه لي طبعاً نفس قصص حبي السابقة من طرف واحد  وبالرغم من  محاولاتي المستميتة  للفت نظره لكن وأنا أختك ما حولك أحد, ياستي  في خضم هذه المشاعر الجياشة

- خضم ها ؟؟؟   O_o

- أي نعم  خضم  ماخذه الكلمة من جيبك أنا ؟

- ( كتمت الضحكة ) أنا آسفه كملي خخخخخ

- المهم ياستي كنت راجعة من السوبر ماركت بعد بداية خفقان قلبي بحبه بيومين وأشوف منظر يدمي القلب

- إيش شفتي؟

- أخواتي الثنتين الله يهديهم  طيحو  آيس كريم  أخت أحمد مناور في الحفريات اللي قدام عمارتنا  وتقوم أختك بالله ترمي الأكياس حقت المقاضي  وتسوي شجاعة وبكل غباء الدنيا أنزل أجيبة من الحفريات وأغسلة بموية السبيل اللي جنب عمارتنا  تخييلي يعني طالما متعنية متعنية  وبتسوين موقف بطولي طيب إشتري لها آيس كريم جديد ؟

- من جد ههههههههههههه

- تخيلي أغسله بالموية راح كل الآيس كريم   وفي هذه اللحظة العصيبة  جا أحمد مناور شاف أخته تبكي والآيس كريم معايا ما أعطاني فرصة أبرر له موقفي وما مداني أفتح فمي بكلمة إلا  وهو يرمي  عليا حجارة وجات في راسي وأنواع الدم

- يالله

- رحت أركض بكل ما أوتيت من نشاط وهمة لبيت أحمد ميته بكا  وملابسي كلها دم  كنت أنزف داخلياً وخارجياً  دقيت باب بيتهم  فتح لي أبوه قلت له وأنا أشهق من البكاء  أحمــممممممم   أحمممممد  تهي تهي <<– ياشيبي أجهش ماني قادرة أحكي   فقشني بالحجارة   ماني قادرة ياعيني عليّ أمسك نفسي إلا صدق من قال هذا الشبلوو من ذاكا الأسد

- إيش دخل الشبل والأسد؟

- يابنتي الأبو طالع على ولده !

- أبغا أفهم مين يطلع على الثاني الولد ولا الأبو ؟

المهم إنهم زي بعض تخيلي يقوم الأب بكل جبروت الأرض

- جبروت ؟

- إي جبروت  تخيلي كسحني الأبو برضو وقالي وإنتي إيش مطلعك من بيتكم ؟ إنقلعي يالله يالله  خلاص أنا ضاقت عليّ الوسيعة ورحت أمشي لبيتنا وأتمسك بالجدران وأجهش جهاشة أقوى من ذي قبل  أبكي على حالي : مظلومة  ومجروحه (داخلياً وخارجياً) ومفقوشة ومكسوحة وأخيراً مطروده  يال الفشلة  لأ  واللي أكدلي إني بجد فدغه ما أصبح عليّ الصبح إلا وأنا مسامحته  ومامداني أفرح إلا الزمن ماهان عليه يفرحني بشوفة أحمد مناور  إلا وأسمع الكلمة اللي صابتني بمقتل

- أيش سمعتي  ( بأنسجام)

( في هذي اللحظة إلا والسيارة توقف فجأة كنت راح أطير للمرتبة اللي قدامي لولا لطف الله أقول للسواق إيش فيه محمد ؟ يقول هادا سيارة سقير  في أجي بسرعة مافي شوف هوا , نبذه مختصرة لمن لا يعرف المدينة وطبعاً هذي خارج النص  كل اللي يسوقون هنا يفترضون إن الدولة ما بنت الشارع إلا لهم خصوصاً لمن يكون سواق ونيت يجي طاااير إشارة ماهي إشارة دوار ولا تقاطع ولا أي زفت مايهدي سرعته ويفترض إن الناس كلهم يجب أن يتداركو الموقف وهوا لأ  ملك الشارع مايمكن يتراجع بسيارتة ولا يوفق لأ واللي يقهر يسب ويشتم ولا كأنه هوا الغلطان الله المُستعان ) عودة للنص :

قلت لريم :

- شفتي كيف حتى السيارة هزتها قصتك الأليمه وقررت إنها تعبر لك عن شعاريرها تجاه معناتك مع الحب

- ياحبي لسيارتكم بتصور معاها بعدين أو أوقع لها في الأتجراف ههههههههههه

- كملي إيش سمعتي (بترقب وإنسجام أكثر)

- سمعت أحمد مناور يتخاصم مع وليد (حبيبي السابق) على نوال أختي كل واحد يقول لأ أنا بخطبها  , اما ريم عليه العوض ومنه العوض  وتنتهي قصة الحب الثالثه على التوالي  قالي عقلي يابنت ليه ماتحولين ع القرايب الأجانب مافيهم خير القرايب ممكن يتورط فيّ ويضطر يحبني ماعنده خيار أصلاً  وهذا نقطة جيدة لصالحي وهنا كان المنعطف الحقيقي لطريقتي بالحب إستغنيت عن عيني السحرية وقررت  أسوي مسح شامل لكل أولاد القرايب وأشوف الأنفع والأكثر غباااء واللي ممكن يحبني

-  تعالي هنا لسه فيكي ع الحب ؟

- انا حالفة أخلي أحب يحبني بالطيب بالغصب أبغا أنحب

- هههههههههههه طيب  إيش طلع في القرايب ؟

- وفعلاً بعد دراسة للعائلة قررت أحب فهد ولد خالتي ساكن بالرياض يجون في الإجازات والأعياد يعني ما يمديه يتمقل فيني راح يحبني على طول وبما انه ولد خالتي التواصل يا سلام سلّم لمن أسمع إنهم بيزوروننا الفرحة مش سايعاني وخشتي ما تتسكر من الوناسة  لعب وضحك ومقالب ولحظات رومنسية من طرف واحد طبعاً تلاقيني منصرعة والولد ما درى عني  <<– ولك ياشيبي شيباه (بالسوري خخخخ)

-  هههههههههههه بالسوري ها ؟

- بقولك موقف من المواقف الرومانسية اللي من طرف واحد كما ذكرت سابقاً كان وقت الشتاء والدنيا تلج

- إخص يا سيبيريا ع التلج تراك في المدينة

- خليني أعبر لك بكيفي  المهم طلع فهود بدون ما ياخذ جاكيته معاه وانا ماهان عليّ إنو يبرد وأروح ورااه أدوره من شارع لشارع و من بيت لبيت  ومن زاوية لزاوية  تخيلي فين لقيته ؟

- فين ؟

- لقيته ناط على جدار بيت شعبي الله يفضحة قلت  من جد مكانك  وأروح أركض فهود جاكيتك  ( وعيوني تطلع منها قلوب وعصافيرا وتجي موسيقى تصويرية وإعادة بالبطيء لنظراتي ) قال : ليش خايفة عليّ عاد هنا إشتغلت نظراتي السحرية ولسان حالي يقول :  كيف لا كاااااان إبن عمي  , وسرعان ما أرخيت عيني بكل رقاقة وأنوثه

- رقاقة من فين جايبة المسطلح ؟

- يووووووه ع البزران إنتي إيش عرفك في تعابير الحب وسيرة الحب وظلم الحب لكل أصحااااابوووووو   إيش فهمك علميني ؟

- أنا آسفه آنسة رقاقه كملي كلامك

- المهم وياميشا ليته كسحني وقتها كان أنهيتها معاه وإنتهت معاناتي مع الحب لكن علقني فيه أكثر( يامال البلشه) بهذي الجمله التافهه اللي طبعاً توازي عندي كلمة أحبك   وخلاص صار عندي كلامه أوامر وكل شي عندي وبيدي أعطيه إياه أتذكر لمن جو يرجعون للرياض  فكرت فكرت إيش أهديه ؟ ومالقيت إلا بيجر أبوي سويت عملية سطو مسلح وأبوي نايم وأسرق بيجره وأعطيه فهود هدية وطبعاً هو مايقول لأ أخذه فرحان حتى لو مسروق وهوا نازل  وجهه بيتشقق وناسه مو قادر يتمالك نفسه سأله أخوه الكبير وش ذا قال بكل ثقه : بيجري ريم تقول ما يبغونة  طبعاً اخوه كفخه ورجع البيجر أشوى إن أمي اللي فتحت الباب ولا كنت رحت في خرايطها  وتمر الأيام ورى الأيام  وانا طردي ورى سراب الحب  داخله جو و ذات مره إجتمعت العائلة الكريمة مره أخرى وقررت أني أقف وقفة جادة  وأواجه الأخ فهد لمعرفة راسي من كراعيني قلت بس يابنت مافيه إلا أرسله نوال أختي مو لأني أثق فيها لا سمح الله لأ , لأنها صريحه تدبج أبو الكلمة في وجهي ولا تبالي بالنفسيه ولا الآثار الجانبية  لأسلوبها ,

- ها إيش صار بعدين  ( صرت هنا متشوقه أكثر)

-  راحت له نوال وأنا بالغرفه رايحه جايه قلقاااااانه وسألته إنت تحب ريم ؟  قال : بكل ما أوتي من إستخفاف وبضحك كمان  لأ طبعاً أنا أحب غادة بنت عمي قالت نوال ليش حرام عليك ليش ماتحبها قال لأن ريم سمره وغاده بيضا  <<– إيش رأيك بالنقاش بس ؟

- ههههههههههههههههههههههههههههههه   ( من جد كنت أضحك هنا لأن عقدة ريم سمارها وعرفت  إيش أساس هالعقدة )

- وبس جات نوال شايلة الصدمة اللي بتصكني فيها وأنا قلقانة ياعيني عليا  رمت عليا الكلام كأنه سهام غدر ذباحه

- نعم ياختي إيشبها السهام ؟

- ذباحه ,المهم يا ميشا وأروح مصدومة وأركض بالشارع وأبكي أفكر بالسنين اللي كنت مخدوعة بحب أفدغ  ركضت لين وصلت بقالة عم علي و أشتري لي فش فاش أبو نص وأجلس آكل وأبكي وقررت أتروش كل يوم لين أصير بيضا وأحلى من غادة , مانسيت فهد بسرعة قعدت فترة وأنا أسمع أغاني حزينة وأبكي معاها بحرقه   أشغل أغنية شادية : ( ليه خلتني أحبك) وقطرات الدموع تنهمر على وجنتي , وهكذا تنتهي قصة الحب بالفشل الذريع جربت داوها باللتي هي الداء  كم مره وفي كل مره يعود قلبي إليّ كسير صرت أرسم رقم تسعه وسهم تعبيراً عن قصص حبي التسعة الفاشلة وأجلس أطالع فيها وأبكي ومسويه غموض عند اخواي يسألوني عن معناها وما أرد أجلس أعييييييييط وأطلع فيها

- يعني أستنتج أن المجموع النهائي لعشاق ريم في الطفولة والمراهقة 9 ؟

- تسعة قصص حب من طرف واحد شفتي أحد يناضل في سبيل الحب مثلي ؟؟؟  ما أعتقد  أبداً وبعدها حرمت أقرب من الحب وسرة الحب وظلم الحب لكل أصحااابووو  من صغري والدنيا ما تبغاني أفرح   أخرج من صدمة لكسحة ومن كسحة لصدمه  وفي الآخر لم أجد متسع للسعادة ( وتطلق ضحكه من ضحكاتها اللي أحبها واللي سبق ونوهت بها سابقاً خخخ)

لأول مره أستشعر الحزن في نبرة ريم صحيح قصص الحب والذكريات هذه ما قالتها لي ريم إلا تسلية ورغبة منها برؤية ضحكتي   فقط لكن هذا ما شعرت به أن هناك حزن في نبرة صوتها,   ريم التي وخلال كل تاريخ صداقتنا ( ماشاء الله) لم أشاهد دمعة واحدة منها ولم أرى التكشيره على وجهها  ,

وفي هذه اللحظة وصلنا لبيت ريم  سلمت عليها ونزلت بيتها  وكعادتها  قبل تروح لازم ترمي نكته  وتخليني وأنا أضحك تبعتها نظراتي لين غابت في مدخل العماره وفكرت  يالله كم أحب ريم بطريقة لا يمكنها هي تصورها  هي أروع إنسانة قابلتها في حياتي طيبة وحبوبة وبير لا قرار له يسع كل  أسراري وحكاياتي تهتم بغيرها أكثر من إهتمامها بنفسها تسعى لإسعاد المحيطين وتتفنن بزرع الإبتسامة على شفاههم بالرغم من أنها تحترق من الداخل أحياناً  , عمر صداقتنا ليس طويل لكنها صديقة حقيقية نادرة الوجود ,

أحبك ياصديقتي , الله يسعدك ويوفقك  في حياتك ويرسل لك من يحبك ويقدرك ويقدر تضحياتك في الحب,

,

,

,

,

تمت بحمد الله 

هذه التدوينة ادرجت بتاريخ 24 يونيو 2008 في الساعة 9:49 م ضمن تصنيف كلام في " الهواء ". يمكنك متابعة أي تعليق من خلال RSS 2.0 خلاصات التعليقات. يمكنك ترك تعليق, أو تعقيب من خلال موقعك الشخصي.